उत्तरी गाजाका ११ लाख प्यालेस्टिनलाई चौबीस घण्टाभित्र दक्षिणी गाजा जान सेनाको उर्दी


काठमाडौं । इजरायली सेनाले उत्तरी गाजा क्षेत्रमा बसोबास गर्ने ११ लाख प्यालेस्टिनलाई चौबीस घण्टाभित्र दक्षिण गाजामा जान उर्दी जारी गरेको छ ।

इजरायलले उत्तरी गाजामा स्थल आक्रमण गर्न यो उर्दी जारी गरेको अन्तर्राष्ट्रिय सञ्चारमाध्यमहरूले जनाएका छन् । यही कारण गाजासँगको सीमा क्षेत्रमा इजरायलले अहिले ठूलो संख्यामा आफ्ना सैनिक तैनाथ गरेको छ ।

उत्तरी गाजा क्षेत्रबाट ११ लाख प्यलोस्टिनलाई दक्षिण गाजा जान जारी गरेको उर्दी इजरायलले संयुक्त राष्ट्रसंघलाई पनि जानकारी गराएको छ । संयुक्त राष्ट्रसंघका प्रवक्ताका अनुसार दक्षिण गाजा जान भनिएको संख्या लगभग गाजा क्षेत्रमा बसोबास गर्ने कुल प्यालेस्टिनको आधा हो ।

इजरायली सेनाले यो उर्दी गाजा र जेरुसेलमको समयअनुसार मध्यरातमा दिइएको थियो । “गाजा सहरमा तपाईँहरू तबमात्र फर्कनु हुनेछ जब हामी घोषणा गर्नेर्छौँ,” इजरायली सेनाले जारी गरेको विज्ञप्तिमा उल्लेख छ ।
संयुक्त राष्ट्रसंघले यति ठूलो संख्यामा मानिस चौबीस घण्टामा दक्षिण गाजा जान नसक्ने जनाउँदै चिन्ता व्यक्त गरेको छ ।

हमासका लडाकुहरू उत्तरी गाजामा सुरुङ बनाई बसेको आशंका इजरायलको छ । उनीहरू प्यालेस्टिनका सर्वसाधरणलाई ढाल बनाई उनीहरूको घरमा आश्रय लिएको आंकलन इजरायली सेनाको छ ।

“आफ्नो र आफ्नो परिवारको सुरक्षाको लागि तपाईंहरू दक्षिण गाजा जानुहोस् र आफूहरु हमासको आतंकबाट टाढा रहनुहोस्, ताकी उनीहरूले तपाईँहरूलाई मानव ढालको रूपमा प्रयोग गर्न नसकुन्,” इजरायली सेनाले भनेको छ ।

प्यालेस्टिन विद्रोही समूह हमासले भने उत्तरी गाजामा बसोबास गर्दै आएका प्यालेस्टिनलाई उक्त ठाउँ नछोड्न भनेको छ । गाजा क्षेत्रमा शासन गर्दै आएको हमासले इजरायल मनोवैज्ञानिक युद्ध गरिरहेको बताएको छ ।

हमासले गएको शनिबार अचानक इजरायलमाथि आक्रमण गरेको थियो । त्यसपछि हमास र इजरायली सेनाबीच युद्ध चर्किएको हो ।

हमासको आक्रमणमा शनिबारयता १ हजार ३ सयभन्दा बढी इजरायलीको मृत्यु भएको अन्तर्राष्ट्रिय समाचार संस्था सीएनएनले जनाएको छ । हमासको आक्रमणमा १० नेपाली विद्यार्थीको मृत्यु भएको छ ।

यस्तै, इजरायली सेनाको आक्रमणमा १ हजार ५०० सयभन्दा बढी प्यालेस्टिन मारिएको जनाइएको छ । संयुक्त राष्ट्रसंघका अनुसार इजरायली आक्रमणका कारण ४ लाख २३ हजार प्यालेस्टिन विस्थापित भएका छन् । शनिबारयता ६ दिनमा गाजाको ३ हजार ६०० स्थानमा ६ हजार बम खसालिएको इजरायलले दाबी गरेको छ । ती बमको कुल वजन ४ हजार टन छ ।

प्यालेस्टिन अधिकारीले भने इजरायलको आक्रमणमा हालसम्म १ हजार ५३७ जना प्यालेस्टिनी मारिएको बताएका छन् । मारिनेमा ५०० बालबालिका र २७६ महिला छन् । हमासले १५० जना इजरायलीलाई बन्धक बनाएको जनाइएको छ ।

इजरायलले आउने केही दिनमा नै आफ्ना सेनाले गाजा सहरमा ‘महत्वपूर्ण अप्रेसन’ चलाउने घोषणा गरेको छ । आम सर्वसाधरणलाई कुनै क्षति नहोस् भनेर पूरा कोसिस गर्ने पनि इजरायलले जनाएको छ ।

संयुक्त राष्ट्रसंघले भने इजरायललाई गाजामा आक्रमण गर्ने निर्णय फिर्ता लिन अपिल गरेको छ ।


Leave a Reply

Your email address will not be published. Required fields are marked *